Emmerson Mnangagwa anayetarajiwa kumrithi Mugabe ataapishwa Ijumaa

Haki miliki ya pichaAFP

Image captionEmmerson Mnangagwa alikuwa mshirika wa Mugabe wakati mmoja lakini pia hasimu mkubwa wa Grace Mugabe ambaye pia alitarajia kumrithi Mugabe

Makamu wa zamani wa rais wa Zimbabwe, ambaye kufutwa kwake kazi kulishababisha kujiuzulu kwa kiongozi wa muda mrefu Robert Mugabe, ataapishwa rasmi Ijumaa, limesema shirika la utangazaji la Zimbabwe (ZBC)

Emmerson Mnangagwa, aliyetorokea nchini Afrika Kusini wiki mbili zilizopita, anawasili leo Jumatano nchini , kulingana na Zanu-PF.

Kuondoshwa kwake madarakani kulisababisha chama na jeshi kwa pamoja kuingilia kati na kulazimisha kumalizika kwa utawala wa miaka 37 wa Bwana Mugabe.

Taarifa kwamba Mugabe mwenye umri wa miaka 93 amejiuzulu zilikuja kwa njia ya barua iliyosomwa bungeni Jumanne , bunge likalazimika kuahirisha mchakato wa kupiga kura ya kutokuwa dhidi yake.

Taarifa hiyo iliibua sherehe kubwa kote nchini zilizoendelea hadi usiku wa manane:

Raia wa Zimbabwe wakisherekea kujiuzulu kwa Mugabe — Image captionTaarifa ya kujiuzulu kwa Bwana Mugabe iliibua sherehe kubwa kote nchini zilizoendelea hadi usiku wa manane

Rais wa Zimbabwe walishangilia kujiuzulu kwa Mugabe mjini Harare — Image captionIlikuwa ni vifijo, nderemo na nyimbo za shangwe katika mji mkuu Harare usiku kucha kufuatia kujiuzulu kwa kiongozi wa taifa hilo wa muda mrefu Robert Mugabe

Baadhi ya rais walipeperusha bendera ya Zimbabwe — Image captionBaadhi ya raia wenye furaha walipeperusha bendera ya taifa la Zimbabwe

Asakari wa Zimbabwe pia walisherehekea kujiuzulu kwa Bwana Mugabe — Image captionWanajeshi wa Zimbabwe pia waliungana na raia kwenye mitaa ya mji mkuu Harare kusherehekea kujiuzulu kwa Robert Mugabe

Katika barua hiyo , Bwana Mugabe alisema kuwa anajiuzulu kwa ajili ya kuruhusu ukabidhianaji wa mamlaka wa amani, na kwamba uamuzi umetokana na utashi wake mwenyewe.

Msemaji wa Zanu-PF alisema kuwa Bwana Mnangagwa, mwenye umri wa miaka 71, atahudumu katika kipindi kilichokuwa kimebakia cha utawala wa Mugabe hadi utakapofanyika uchaguzi mkuu unaotarajiwa kufanyika Septemba 2018.